3 cildlik "Qarabağ Sizsiz..." kitabının təqdimatı keçirildi.
04.04.2024
04 aprel 2024-cü il tarixində Respublika fizika-riyaziyyat və informatika təmayüllü liseydə tarix müəllimi Günay Şərifzadənin təşkilatçılığı ilə şagirdlərimiz tərəfindən hazırlanmış 3 cildlik “Qarabağ Sizsiz...” kitabının təqdimatı keçirildi. Təqdimat üçün düzənlənən tədbirdə Aprel, Tovuz döyüşlərində və 44 günlük Vətən müharibəsində şəhid olmuş əsgər və zabitlərimizin valideynləri, qazilər, Vətən Müharibəsi Qəhrəmanları, digər ictimaiyyət nümayəndələri iştirak edirdilər.
Tədbir Azərbaycanın azadlığı və ərazi bütövlüyü uğrunda canından keçmiş şəhidlərimizin xatirəsinin birdəqiqəlik sükutla yad edilməsi ilə başladı. Daha sonra Dövlət Himni səsləndirildi və liseyin direktoru Tariyel Talıbov açılış nitqini söylədi. Tədbir lisey şagirdlərinin hazırladıqları müxtəlif səhnəciklərin və şəhid valideynlərin çıxışlarının növbələşməsi ilə davam etdi.
Tədbirin sonunda “Qarabağ Sizsiz ...” kitabının tərtibçisi, ideya müəllifi Günay Şərifzadə çıxış edərək, şərait yaradanlara təşəkkürünü bildirdi, kitabın birinci cildinin ilk dəfə indi 11ç sinfində oxuyan şagirdlərin köməyi ilə yazıldığını, sonrakı nüsxələrinin 10ç, 10d, 10e sinif şagirdlərinin iştirakı ilə tamamlandığını qeyd etdi. Müəllif, eyni zamanda kitabın adı ilə bağlı da qısaca məlumat verdi. Belə ki, “Qarabağ Sizsiz ...” adını Şəhid General, Milli Qəhrəman Polad Həşimovun ovladı liseyin 11ç sinif şagirdi Davud Həşimov təklif etmişdir. Bu ad iki mənada düşünülür. Qarabağ Sizsiz, yəni Siz elə Qarabağın özüsüz. Digər mənası: Qarabağ azaddır, amma fiziki olaraq Sizsizdir.
Tədbir “Qarabağ Azərbaycandır!” şüarı ilə sona çatdı.
Liseyin rəhbərliyi tədbirin təşkilində əməyi olan hər kəsə tək-tək təşəkkür edir, cansağlığı, işlərində uğurlar arzulayır!
